ممكن حد يقولي هل اللي انا بفكر فيه صح؟

[sameka_100]

السلام عليكم ورحمة الله وبركاته
ارجوكم المساعده ضروري جدا
في البداية انا طالبه في الفرقه الثالثه من جامعة الهندسه وتعرفت بشاب على الانترنت منذ 3 سنوات وتحدثنا سويا والحمد لله ربنا هداني وشعرت باني افعل شئ حرام وقطعنا الاتصال ببعض وتقدم لخطبتي ولكن اهلي رفضوا لانه حاصل على تعليم متوسط ولكني انا تعليم عالي ومنذ اسبوعين وجدته يحادثني ويطلب ميعاد من اهلي ليتقدم مره ثانيه لخطبتي فحاولت اقناع اهلي لانه شاب الحمد لله ملتزم ويخاف ربي وهو يشتغل وحالته الماديه ميسوره الحمد لله وعنده الشقه ولكن اهلي يرفضون لفارق التعليم..هل اصبح الزواج الان بالشهاده وليس بالدين؟
وهم دائما يقولون لي باني سوف اندم على اختياري وساعتها ندمي مش هيفيد .....اعمل ايه؟مع العلم باني مواظبه على صلاة الاستخاره.....

[حفيد الفاروق]

أتركي أمرك على الله أدعي كثيرا هو عزوجل هادي السبيل وأسقطي حملك على الله وهو بإذنه سييسر لك ولا تخافي فالله هو الهادي القادر على كل شئ.

[e88sajedah_lellah]

السلام عليكم ورحمة الله وبركاته

اختي الحبيبة في الله

بالنسبة لفارق التعليم ده بيرجع لتفكير كل فتاة وارادتها طالما انه ملتزم

في البداية لازم نفكر تاني في اللي حصل ده من الكلام قبل كده ونستغفر ربنا عليه جدا

وبعدها ندعي ربنا بيقين بعد صلاة الاستخارة بالدعاء

وخليكي كلك يقين بأن طالما استخرتي يبقى اللي فيه خير هيحصلك بإذن الله سواء معاه
او لا

ربنا يكتبلك اللي فيه الخير يا رب

[مسلمه مصريه ولى الفخر]

اختى فى الله
اتمنى انك تقبلى كلامى بسعه صدر
اولا انتى تقولى انكم تعرفتم من خلال النت
طيب انتى تعرفى منين انه شخصيه جاده او انه صريح فى كل ما قاله لكى عنه
كمان اكيد اسرتك شايفه ان انتى مش هتقدرى تتعاملى معاه مع فارق التعليم
واكيد لاسرتك وجهه نظر
انا طبعا حكايه انه بيتقدملك دى بتحسب ليه ويوضح انه انسان لا يلعب بيكى كما يقال
ولكن يا اختى انتى طبعا متعرفيش حاجه عنه يعنى هتسألى عليه مين _هتعرفى تسألى عن اسرته ازاى كل الحاجات الضروريه دى الى بتكون قبل الزواج
ثانيا انتى بتقولى انه انسان ملتزم
اختى فى الله هو لو فعلا اخ ملتزم كان عمره ما هيتكلم مع اخت اجنبيه عنه من خلال النت وانتى بتشوفى بنفسك من خلال منتدانا فى المواضيع المشتركه مفيش رد من الاخت او الاخ غير جزاك الله خيرا وممكن يكون دعاء او شيء هكذا لكن كلام ونقاشات بتكون بين الاخوه وبعضها او الاخوات وبعضها
فكرى يا اختى جيدا
لان اقسم بالله ان الكثير من البنات ضاااااااااعوا بسبب ارتباط النت
وخلى بالك ان كل بنت ليها باب
يعنى فيه شباب مبيلقوش فايده من البنت فى الكلام من غير ارتباط
فيدخل من باب انى هرتبط بيكى
ويجى ويتقدم ويعمل الخطوبه وكل حاجه بس فى الاخر بيسبها
خلى بالك يا اختى واستخيرى الله واكثيرى من الدعاء والاستغفار
وربنا يكتبلك ما فيه الخير الى ما يحبه ويرضاه
وارجو ان تأخذى كلامى بسعه صدر منك

[dr_karmen]

أوافقك اخوتى وأخواتى على ما نقلوه
واعلمى أن مهما كان علمنا فى الدنيا ...أهلنا برده ليهم الخبرة فى الحياة
يعنى مفيش أهل عايزين لبنتهم غير الخير أكيد
أنا معاك ان الدين هو الأهم لكن أحيانا الشهادة بتأثر تأثير سلبى
ازاى؟؟

بصى لو فرق فى التفكير بينهم كبير هتكون لغة الحوار بينهم منعدمة والتفاهم شبه مفيش
وحتى لو لم يكن هناك فرق فى التفكير والأخ على مستوى عالى من الثقافة والعلم
بتفضل نظرة المجتمع دايما سيف بتقطع فى علاقتكم
لأن الرجل بطبيعة القوامة بيكون فى نفسه يشعر أنه يجب أن يكون الأفضل من زوجته
ولا يحب أن تكون أفضل منه وإن تناسى أو نسي أكيد فى موقف فى يوم من الأيام هيفكره بده
مثلا إبداء رأيك فى أمر ما متعلق بدراستك او تخصصك
هتجدى أن رأيك حساس جدا له وممكن تكون نقطة خلاف
والله يا أخيتى أنا احدثك من مواقف شفتها مع أخوات

وفى حاجة عايزاكى تحطيها فى بالك
دايما طريقة تعرفكم ببعض هتفضل طول حياتكم نقطة ضعف
ازاى؟

يعنى هتكونى قليلة فى نظره شوية
وسامحينى لو قلت لك مش غالية زى البنت اللى ممكن يتزوجها وهو عارف مثلا انها عمرها مكلمت شاب
أو سمحت لنفسها تكلم شاب فى خلوة
فهتفضل مشكلة فى حياتكم

لكن فى الأول والآخر
عليك بالإستخارة
وتتحرى رضا الأهل
والله ربنا ماهيضيعك إن شاء الله

أعرف أخت ملتزمة جدا وكان فى البيت عندها مش ملتزمين وتقدم لها شخص من أقاربها
بلغة الناس ميترفضش شهادة وعيلة محترمة وشغلانة مربحة ومركز مرموق واخلاقه كويسة جدا وصفات شكلية مميزة
الناس بتقول ده ميترفضش ابدا
لكن مش ملتزم أو علاقته بالدين الفروض الأساسية فقط
وتحت اصرار وضغط من أهلها وافقت واستعينت بالله انها عملت ده ارضاء لهم وارضاءهم من رضا ربنا
وسبحان الله بعد شهور من عقدهم الأخ بدأ يلتزم وسبحان الله اصبح أخ مبارك باذن الله ولا نزك على الله احد

يعنى تحرى أنتى طاعة الله واعرفى أنه لو كان قدرك أنك تتزوجى منه هتتزوجى منه ولو لا والله مهما حدث لن تتزوجوا

[رشيده]

:LLL:
[السلام]
اختى فى الله
حبيبة قلبى
صلى صلاة استخاره
وسيبيها لربنا
واتوكلى عليه
وان شاء الله ربنا هو الى هايقف معاكى ويفيدك
ولو هو انسان جاد وشاريكى ومش بيلعب بيكى
ان شاء الله ربنا هايوفقكوا الى ما فيه الخير
بس ماتعمليش حاجه غلط

[محمد هلال]

بسم الله الرحمن الرحيم
السلام عليكم ورحمة الله وبركاته.
أختى فى الله قال الله تعالى فى كتابة الكريم
وعسى ان تحبوا شيئا وهو شر لكم صدق الله العظيم
سيبى الموضوع على ربنا اتى أخذتى بالاسباب وان شاء الله ربنا هيهديكى للى فيه الخير ومصلحتك
لأن طبعا أمر المؤمن كله خير تأكدى ان ربنا مش ممكن يجيبلك حاجة وحشة الحمد لله انتى فى نعمة

[محبة الهادي]

أتركي الأمر على الله,تركي الأمر على الله,أتركي الأمر على الله ،لا أجد ما أزيد على كلام أخوتي.

[sameka_100]

جزاكم الله كل خير بالله عليكم ادعولي
بس احب اوضح لكم شئ هو في بادئ الامر لم يكن ملتزم جديا ولكنه بعد ذلك اصبح ملتزم ولذلك لم نتحدث سويا الا لما يتقدم رسمي