أنا بقيت شيخ !!!!!

[قلب معلق بالمساجد]

بسم الله الرحمن الرحيم

في موضوع (كلاكسات) في قسم ع الرصيف كتبت قصة (إلتزامي)
و القصة كانت حلوة و مؤثرة و نهايتها جميلة عاملة زي الأفلام
بس للأسف القصة في الواقع مانتهتش باللي كتبته هناك بإني عرفت إن السلفية هي الطريق الصحيح للوصول لربنا
القصة بعد كده حصل فيها حاجات كتيـــــر

بصوا

اسمحولي أتكلم شوية مع نفسي
يعني اللي هايتكلم دلوقت ... أنا و نفسي
وانتوا مالكوش دعوة

....................

فاكر الأيام دي ؟؟؟

أول مابدات لحيتك تكبر شوية؟؟
و الناس كلها بقت بتقوللك يا شيخ
و بقيت لما تشوف واحد بيدخن تروح تكلمه ؟؟
و لما تلاقي سواق الميكروباص مشغل أغاني تديله شريط و تكلمه ؟؟
لما كنت بتمشي في الشارع مصحفك في أيدك و لا هامك متبرجات و لا غيره
و لما كنت بتسجد و تقعد تتكلم مع ربنا و تحكيله على كل اللي مزعلك و تشتكيله ؟؟

فاكر المشاعر اللي كنت بتحس بيها أيامها ..؟؟

كنت بتحس إنك طاير من الفرحة .. و إن الحياة كلها منورة .. و إنت ماشي في الشارع حاسس إن الشوارع و العمارات بتضحك و الدنيا فعلا شكلها اتغير
حتى لما تحصللك مشاكل
لما السواق يزعقلك و يقوللك :
( لا يا شيخ .. التسجيل مش هايتطفي و مش عاجبك انزل )
كنت بتنزل و انت زعلان على حاله بس مش هامك خالص إنه زعقلك و بتبقى فرحان انك سيبت حاجة لله
و لما كانت بتحصللك مشاكل في البيت و خناقات .. أول ما المشكلة تعدي كنت بتحمد ربنا و بتفرح جدا و تحس إنك نجحت في الابتلاء

فاكر المشاعر دي

لما كنت كل ماتعرف حاجة جديدة في الدين بتحاول انك تنفذها فورا من غير ماتسأل ده واجب و لا مستحب
لما قعدت تتدرب مع نفسك في البيت عشان تعرف تقعد جلسة التورك في الصلاة
و لما كنت كل لما تيجي تشرب حاجة تدور على حتة تقعد فيها عشان تشرب وانت قاعد على السنة


فاكر المشاعر دي؟؟؟؟

(مشاعر البداية)
؟؟؟

أمال إيه اللي حصل بعد كده ؟؟؟

كنت في الأول بتستغرب من كلمة يا شيخ و يا أخي و الكلام ده و تقول أنا لسه ماوصلتش للحاجات دي
دلوقت اتعودت على الكلمة دي .. و لما حد بيقول يا شيخ (حتى لو مايقصدكش انت) بتبص فاكره بينادي عليك
دلوقت سمعت شرايط كتير و حضرتلك شوية دروس
و بدأت تصدق إنك شيخ بجد
و الناس بقت بتسألك في الدين
و انت بقيت بتفتي
و بقيت تقول الشيخ فلان ده مبتدع
و الشيخ فلان ده ربنا يهديه
و بقيت تقول : أصل ده مستحب يا عم
لا ده مش حرام ده مكروه
لا أصلك مش فاهم .. ده في مواضع تجوز فيها الغيبة
و بعد كده بدأت تتخلى عن حاجات كتير كنت بتعملها و تقول أصلها مستحبة
و المرحلة اللي بعدها رجعت لشوية معاصي و بقيت تنام عن صلوات و تستتقل المرواح للمسجد و.. و...
... بس برضه
..أنا لسه( ملتزم )

فاكر مشاعرك في الفترة دي ؟؟؟

مشاعر ... مشاعر إيه ؟؟
مابقاش في مشاعر خلاص

أنا بقيت لما أسمع درس في الرقائق أقول الحاجات دي كلها أنا عارفها و سمعتها قبل كده
أنا عديت المرحلة دي
و الصلاة خلاص اتعودت عليها و مابقتش باحس فيها بأي حاجة

مابقاش في أي مشاعر


فيييييييييييييييييييييييييين أيام زمان ..؟؟

طيب أمال المشاعر الحلوة بتاعة زمان دي راحت فين ؟؟؟

أنا هاقوللك

مشكلتك إنك عشت الوهم
كذبت كذبة كبيييييييييييرة و صدقتها
الكذبة دي هي كذبة
أنا بقيت شيخ

بس استنى بس و ماتقعدش تقوللي لا ياعم انا لاشيخ ولا حاجة ده أنا غلبان و كلي ذنوب

دي الكذبة التانية

إنك حتى مع نفسك من غير ماحد يبقى معاك بتكدب و تقول إنك شايف نفسك ولا حاجة
و إنت من جواك شايف نفسك حاااااااااااااجة كبيييييييييييييييييرة جداااااا
بس المصيبة إنك مش عارف كده
مش عارف أنك شايف نفسك
موضوع معقد مش كده ؟؟

بس هي دي الحقيقة

شيخ الإسلام كان في عصره في شبهات كتير و كان هو بيتصدى لكل الشبهات دي و ليه كتب كتير في الرد على المبتدعة
بس شوف الكلمة دي
كان بيقعد بعد صلاة الفجر في المسجد حتى يتعالى النهار يعني لحد الظهر و يقول:
(هذه غدوتي لو لم اتغدى هذه الغدوة لسقطت قواي)

و العلماء بيقولوا إن الكلام في الرجال و الرد على أهل البدع لو ماكانش صاحبه ليه حال مع ربنا يقسي القلب

عرفت ليه المشاعر راحت ؟؟
قال الإمام الذهبي
(الكلام في الرجال لا يجوز إلا لتام المعرفة تام الورع)

يعني مش إنت خااااااااااالص

إنت تسكت و (تتلهي على عينك) و تبص لحالك
إنت إيه حالك مع ربنا
إيه حالك في صيام النوافل و قيام الليل و الدعوة إلى الله
إنت صدقت أنك شيخ بجد ولا إيه

لأ فوووووووووووووووووووووووووووووووق

فوق و حاول تلحق نفسك قبل فوات الأوان



طيب أنا أعمل إيه دلوقت عشان أرجع الأيام دي تاني

-لازم أول حاجة تلجأ لربنا
خليك قدام الباب و ألح في الدعاء إنه يخلصك من اللي انت وصلتله ده
- ابعد نفسك عن أي مجال للجدال و الكلام عن أي حد مش موجود سواء مشايخ أو غيره حتى لو مخالفين للمنهج السلفي و لو يعني اتزنقت و انت مثلا بتدعو حد و بتكلمه مثلا عن الأغاني و قاللك أصل الشيخ فلان قال تقوله إن كل إنسان ممكن يغلط و مادام الأمر في نص من القرآن و السنة يبقى ماينفعش نقدم كلام أي حد على كلام ربنا و كلام الرسول صلى الله عليه و سلم وكده بس إوعى تغلط في الشيخ اللي قاللك عليه و والله ده هايعليك عند اللي قدامك ده
-لازم يبقى ليك حال مع ربنا و ليك ورد من العبادات تحاسب نفسك عليه
- باختصار .. لازم تقف مع نفسك و تشوف يومك اللي انت بتقضيه ده يوم واحد ملتزم ولا لأ .

.................................

كده أنا خلصت كلام مع نفسي

جزاكم الله خيرا

[الله حبيبي]

جزاك الله خيرا
و الله حضرتك ذكرتنا بمشاعر زمان كنا بنحسها في أول التزامنا و الوقتي بنحاول نجيبها تاني و مش عارفين
اللهم ردنا اليك ردا جميلا ....
"اللهم اقسم لنا من خشيتك ما تحول به بيننا و بين معاصيك و من طاعتك ما تبلغنا به جنتك و من اليقين ما تهون به علينا مصائب الدنيا "
"اللهم اني ظلمت نفسي ظلما كثيرا و لا يغفر الذنوب الا انت فاغفر لي مغفرة من عندك و ارحمني انك انت الغفور الرحيم"

[حفيد الفاروق]

بصراحة
أنا حاسس إنك بتتكلم عني

الله المستعان

[dr_Muslim]

جزاك ربي خيرا أخي الحبيب
كلام ذي الفل

طيب أنا أعمل إيه دلوقت عشان أرجع الأيام دي تاني


-لازم أول حاجة تلجأ لربنا
خليك قدام الباب و ألح في الدعاء إنه يخلصك من اللي انت وصلتله ده
- ابعد نفسك عن أي مجال للجدال و الكلام عن أي حد مش موجود سواء مشايخ أو غيره حتى لو مخالفين للمنهج السلفي و لو يعني اتزنقت و انت مثلا بتدعو حد و بتكلمه مثلا عن الأغاني و قاللك أصل الشيخ فلان قال تقوله إن كل إنسان ممكن يغلط و مادام الأمر في نص من القرآن و السنة يبقى ماينفعش نقدم كلام أي حد على كلام ربنا و كلام الرسول صلى الله عليه و سلم وكده بس إوعى تغلط في الشيخ اللي قاللك عليه و والله ده هايعليك عند اللي قدامك ده
-لازم يبقى ليك حال مع ربنا و ليك ورد من العبادات تحاسب نفسك عليه
- باختصار .. لازم تقف مع نفسك و تشوف يومك اللي انت بتقضيه ده يوم واحد ملتزم ولا لأ .

طبعا يلزم قراءة القرآن ويدمن الذكر وبذلك يدخل في حصن الملك فلا تتخطفه الشياطين لأنك ذكرت أنه من قسوة القلوب وقسوة القلوب علاجها القرب من علام الغيوب والأنس بذكرة وإدمان طرق الباب فمن دام طرق الباب فُتِح له
فلما أكون مع الملك في معيته ماهو قال " أنا مع عبدي ما ذكرني وتحركت بي شفتاه " أنا العبد الحقير مع الملك الكبير آااااااااه بجد طيب هو فيه حد هايبقى ذينا أيه النعيم ده أيه الفرحة دي أيه السعاده دي
ومن كان لله أعرف كان أكثرهم خوفا من الله

الشاهد :: طالما قلنا إنه بقى شيخ والناس بتسأله مش عيب لما يقول سأسأل مشايخي ثم أجيب بإذن الله
وعليه بالتعلم والصبر على التعلم مش يضرلي مجلس علم خلاص بقى إمام الأئمة أو يروح يحضر خطبتين لشيخ من مشايخنا حفظهم الله يبقى خلاص تلميذه المقرب وبيفتي عنه --- لا لا لا
أتق الله حيثما كنت ولا تغتر فإنماأسقط من سقط الغرور
وأصبروا وصابروا ورابطوا وإتقوا الله لعلكم تفلحون

[فجـــــــــــــــر]

جزااااااااااااااااااااااااااااااااك الله كل خير
والله كأن حضرتك بتقول الكلام اللي يدور بداخلي
جعله الله في ميزان حسناتك ونفع بك
اللهم ردنا اليك ردا جميلا
اميـــــــــــــــــــــــــــــن

[ابي بن كعب]

جزاكم الله خيرا ....... كلنا هذا الرجل اخي الحبيب اسال الله عز وجل ان يردنا الي الاسلام ردا جميلا اللهم امين

[المشتاقة للجنة]

جزاكم الله خيرا
الهم ارزقنا الاخلاص فى القول والعمل

[ابن القيم]

جزاك الله خيرا

اللهم اهدنا وهدي بنا

[way2islam]

جزاكم الله خيرا اخي على الموضوع و في نفس الاطار أريد أن أشير إلى مانراه اليوم من بعض الملتزمين إلا من رحم ربي حيث و العياذ بالله دخلهم الكبر في عبادتهم والتزامهم حيث ما ان يرى نفسه ملتزما و يتقصى سنة رسول الله :87[[: و غيره لم يهديه الله بعد فيتكبر على خلق الله بأنه وحدهالمتبع لسنة نبيه :87[[:و أنه وحده يعلم كل شيء عن الدين و أنه غير محتاج للوعظ و الارشاد اذ أنه أصبح الأن من التقاة فهذا اخوتي أخطر ما يصيب عبدا من عباد الله ألا وهو الغرور والتكبر و قد سمعت مقولة من أحد مشايخن الكرام تقول رب معصية أورثة ذل و انكسار من طاعة أورثة عزا و استكبار فلهذا اخواني لا بد أن ننتبه من هذا الامر الخطير فلا يظن أحد منا أنه مادام في طاعة فهو خير من غيره من العصاة لأن هذا العاصي المحس بذنبه قد يهديه الله و لنعلم جميعا بانه لا أحد منا في طاعة دائم فلا نحن بقادرين على أن نوفي شكر نعم الله و لا بقادرين على عبادة الله حق عبادته ثم لابد لنا كذلك أن ننتبه إلى أن الله لا يقبل عبادة فيها ذرة كبر
فالله الله عباد الله في أنفسنا
و لا حول ولا قوة إلا بالله

[نسيبة بنت كعب]

جزاكم الله خيرا
اللهم ردنا اليك رد جميلا

[سراج ابوسعيد]

والله يا اخى الواحد مش
عارف يقول اية
اللهم يا مقلب القلوب ثبت قلوبنا على دينك و طاعتك

[ahmed attia]

ده فعلا انا

[قلب معلق بالمساجد]

جزاكم الله خيرا
و احذروا إخوتي من فخ الشيطان
إنك أول ماتسمع الكلام ده تفكر في حد من أقرانك أو من معارفك و تقول : آه فعلا فلان ده كده
لا يا أخي انظر لنفسك أولا
جزاكم الله خيرا

[رشيده]

جزاكم الله خيرا
اللهم بلغنا منزلة الشيوخ والصالحين

[قلب معلق بالمساجد]

جزاكم الله خيرا
مش معنى الكلام اللي أنا قلته ده يا جماعة إننا نقعد نقول احنا وحشين و مفيش فايدة فينا ...
لأ .. الهدف إننا نعرف واقعنا و نبدأ في إصلاحه
و أحسن حاجة تعملها تاخد عليها حسنات و تخليك انت نفسك تتحسن الدعوة إلى الله و خدمة الدين
جزاكم الله خيرا

[محبه لله]

الموضوع جمييييل جداا وخلا كل واحد فينا يراجع نفسه ويراجع حاله مع ربنا

نسال الله عزوجل ان يفقهنا فى ديننا اكثر واكثر

وان يرزقنا الثبااااااااااااااااااااااات

جزاك الله خيرا

[أينقص الدين وأنا حى]

[السلام]

اخى الكريم
جزاك الله خيرا واسأل الله تبارك وتعالى ان ينفعنا بهذ الكلام النافع

وجزى الله كل من رد خيرا

وحقا وكأنى ارى نفسى وانا اقرأ هذذا الكلام

ولكنى اخى اقول

انها والله لتتحول الى ظاهرة صحية لو استغلها الواحد منا وانطلق فى الطريق الى الله تبارك وتعالى

فكلما جلس العبد مع نفسه وحاسبها .. كان ذلك دافعا للعبد ان يسعى اكثر واكثر فى طريقه لربه جل وعلا

فأنا لاانسى كلام لابن القيم:
تخلل الفترات للسالكين أمر لا بد منه، فمن كانت فترته إلى مقاربة وتسديد، ولم تخرجه من فرض، ولم تدخله في محرم؛ رجي له أن يعود خيرا مما كان.

وايضا كلاما

لابن مسعود لما بكى في مرض موته وقال :
"إنما أبكي لأنه أصابني في حال فترة، ولم يصبني في حال اجتهاد "

وكان النبى دائما مايقول
"اللهم إني أعوذ بك من الهم والحزن، والعجز والكسل، والبخل والجبن، وضلع الدين، وقهر الرجال "



[الله الموفق]

[●..مـُحـب الجـنـة..●]

موضوع رائع جدا كما تعودنا منك اخى الحبيب
واقول كلمة كنت سمعتها من احد المشايخ زمان بيقول :
الشاب ربنا هداه شوية وحضر درسين وقرا كلمتين وطلعله فى وشه شعرتين فرحان بيهم ورايح الجامع جاى من الجامع
واصبح هو الحبر العلامة وشيخ الاسلام وحجة العصر و الأوان واصبح له أراء فى هذا وذاك
فيقول : انا رأيى ...........
انا اعتقد ............
انا اقول ..........
انا احبذ ..........
وتناسى ان المرء كلما زاد علمه زادت معرفته بمقدار جهله !!
نعوذ بالله أن نكون من هؤلاء ونسأله الاخلاص فى الاقوال والاعمال والاحوال
بارك الله فيكم

[قلب معلق بالمساجد]

جزاكم الله خيرا الأخ محبه الله
و الأخ مصراوي حبيبي ربنا يكرمك يارب و جزاك الله خيرا
و لي وقفة مع مشاركة الأخ (أينقص الدين و أنا حي)
أولا اسم جميل جدا ماشاء الله و نسأل الله أن يكون هذا شعارنا كلنا
و بالنسبة لكلام حضرتك فهو كلام ممتاز و أنا كان نفسي أوضح النقطة دي بس ماكنتش هاعرف أوضحها زي ماحضرتك وضحتها كده جزاك الله خيرا
فعلا المفروض الكلام اللي زي ده و اللي أكيد كتير مننا حاسس بيه يكون دافع لينا اننا نعمل حاجة مش يحبطنا
أكيد الفترة دي لازم تعدي على كل انسان في طريقه لربنا بس المهم انها ماتطولش

جزاكم الله خيرا

[دينى الاسلام]

جزاااااااااااك الله خيرا